Sir Alex ráðinn í vinnu hjá UEFA

Sir Alex Ferguson, fyrrum knattspyrnustjóri Manchester United, er kominn í vinnu hjá evrópska knattspyrnusambandinu en Skotinn hefur verið útnefndur þjálfara-sendiherra UEFA.

Ferguson hætti sem knattspyrnustjóri Manchester United síðasta ár eftir 27 ára starf á Old Trafford en hann er allra sigursælasti fótboltaþjálfari allra tíma. United varð þrettán sinnum enskur meistari undir hans stjórn og vann Meistaradeildina tvisvar sinnum.

„Sir Alex verður stjórnaformaður elítu-þjálfaranna sem hittast á hverju ári. Hann verður einnig meðlimur í tækninefnd UEFA í kringum Meistaradeildina og Evrópukeppni landsliða," sagði Michel Platini, forseti UEFA, við BBC.

David Moyes tók við liði Manchester United eins og frægt er en það hefur ekkert farið framhjá neinum að Sir Alex Ferguson mætir í stúkuna á mörgum leikjum liðsins.

Ferguson hefur verið í hópi elítu-þjálfaranna í langan tíma og ætti því að vita vel um hvað þessir árlegu fundir þeirra snúast um.