Jafnt í markaveislu hjá Everton og Liverpool

Nágrannaliðin Everton og Liverpool skildu jöfn, 3-3, í hreint út sagt stórkostlegum knattspyrnuleik á Goodison Park í dag.

Leikurinn byrjaði með gríðarlegum látum og það var ekki búið mikið af leiknum Coutinho kom Liverpool yfir. Hann potaði boltanum yfir línuna af stuttu færi.

Everton lét þetta mark ekki á sig fá og liðið jafnaði skömmu síðar. Kevin Mirallas fékk boltann á fjærstöng og skoraði. Tvö mörk og ekki liðnar átta mínútur af leiknum.

Luis Suarez kom svo Liverpool yfir með stórkostlegu marki beint úr aukaspyrnu. 1-2 fyrir Liverpool í hálfleik.

Liverpool vildi fá rautt spjald á Mirallas er hann braut illa á Suarez í fyrri hálfleik. Hann slapp með skrekkinn og gerði það aftur í síðari hálfleik er hann fór með olnbogann upp í skallaeinvígi og blóðgaði Jordan Henderson.

Everton fékk heldur betur færin til þess að jafna en Mignolet var í banastuði í marki Liverpool og varði oft á tíðum glæsilega.

Hann kom þó engum vörnum við er Lukaku jafnaði leikinn nítján mínútum fyrir leikslok. Hann var einn á auðum sjó í miðjum teignum og skoraði.

Hann var svo sannarlega ekki hættur því hann kom Everton svo yfir með frábærum skalla eftir hornspyrnu. Mögnuð endurkoma hjá Everton.

Fjörið var þó ekki búið því Daniel Sturridge jafnaði skömmu fyrir hlé með glæsilegum skalla. Aukaspyrna frá Gerrard sem Sturridge beindi í fjærhornið.

Þrátt fyrir fína tilburði á lokamínútunum þá tókst liðunum ekki að bæta við mörkum.

Staðan í ensku úrvalsdeildinni.