Leiðinlegar kosningar í Noregi

Það er bara gott að kosningabaráttan sé búin að vera leiðinleg því það sýnir og sannar að Noregur er samlynt og ríkt land. Þetta stendur í norska dagblaðinu VG í dag.

Í dag er kosið til stórþings í Noregi. Það er þó ansi rólegt í kjörklefunum í ráðhúsinu í Osló og rímar það við kosningabaráttuna undanfarnar vikur.

Stjórnmálaskýrendur í Noregi eru sammála um að kosningabaráttan hafi verið sérstaklega leiðinleg. Enginn vafi virðist leika á því að borgaraflokkurinn Hægri vinni Verkamannaflokkinn og því eru kosningaúrslitin löngu ljós í huga margra.

Ástæðan fyrir því að Hægri eru sigurstranglegir er ekki almenn óánægja með starfandi forsætisráðherra, Jens Stoltenberg, heldur sú að fólk vill sjá ný andlit í pólitík eftir átta ár með Stoltenberg og ríkisstjórn hans.

Einn kjósenda sagði í viðtali við Politiken að olían hafi gert Norðmenn aðgerðarlausa og ríkjandi ánægja í samfélaginu festi stjórnmálamenn í léttvægum smáatriðum í stað þess að reyna að svara spurningum eins og hvað gerist þegar olían klárast.

Norska dagblaðið, VG, skrifar í leiðara sínum í dag varnarræðu um hina leiðinlegu kosningabaráttu.

„Það eru ekki djúpar deilur á milli Norðmanna. Við erum heldur ekki í djúpri efnahagskrísu eins og mörg önnur lönd í kringum okkur,“ stendur í blaðinu og leiðarahöfundur heldur áfram.

„Einhverjir óska sér kannski æsandi kosningabaráttu spennunnar vegna. En það er skrítið að væla yfir því að í Noregi búi fólk í samlyndi og að samfélagið standi traustum fótum. Ef gjaldið fyrir það er leiðinleg kosningabarátta þá getum við alveg lifað með því,“ stendur í hinu norska dagblaði VG.