25 hryðjuverkamenn sluppu

Vígamenn Talibana í Pakistan gerðu mikið áhlaup á fangelsi í bænum Dera Ismail Khan í norðvesturhluta landsins í nótt og frelsuðu þaðan um 250 fanga, þar á meðal 25 manns sem yfirvöld segja „hættulega hryðjuverkamenn“.

Sex lögregluþjónar, sex fangar úr hópi sjíta-múslima og tveir almennir borgarar létu lífið í árásinni, en talibanarnir voru um 70 talsins og vopnaðir byssum og sprengjum. Talibanar gengust við árásinni, sem stóð í um fjóra og hálfa klukkustund, og sagði talsmaður þeirra að átta liðsmenn þeirra hafi verið útbúnir sprengjuvestum og tveir hafi sprengt sig í loft upp.

Aðgerðin hófst með sprengingu sem skók allt hverfið í nágrenni fangelsisins, en eftir það sprengdu talibanarnir margar minni sprengjur við útveggi fangelsisins og komust þannig inn. Þegar þangað var komið tókust þeir á við lögreglu og verði og kölluðu með gjallarhorni á þá fanga sem þeir voru komnir til að frelsa.

Lögregla og öryggissveitir höfðu hendur í hári níu fanga í nótt og leita nú, með fulltingi hersins, hinna sem sluppu.

Fangelsisyfirvöldum hafði borist hótun um að árás yrði gerð, en að sögn bjuggust þau ekki við því að talibanar myndu láta til skarar skríða svo fljótt.

Um 5.000 fangar voru í fangelsinu, þar af um 300 vígamenn.

Þetta er ekki í fyrsta sinn sem talibanar grípa til aðgerða til að frelsa félaga sína, en í apríl í fyrra sluppu 400 fangar, þar á meðal 20 hættulegir vígamenn, í álíka árás á fangelsi í Bannu.