Hodgson hefur mikið álit á Joe Hart

Joe Hart, leikmaður Manchester City, verður í markinu þegar Englendingar mæta Svartfellingum og Pólverjum í undakeppni HM á næstunni en Hart hefur ekki náð sér á strik í ensku úrvaldeildinni.

Manchester City tapaði illa, 3-1, á heimavelli fyrir Bayern Munchen í Meistaradeild Evrópu í vikunni og átti Hart ekki sinn besta dag.

Leikmaðurinn hefur verið mikið gagnrýndur á þessu tímabili en landsliðsþjálfarinn hefur enn trú á honum.

„Ég er ekki blindur og geri mér grein fyrir því að Joe [Hart] er ekki að finna sig eins vel og hann getur um þessar mundir,“ sagði Hodgson.

„Hann er frábær markvörður og ég veit að hann er ekki sáttur við sína eigin frammistöðu en ég hef samt sem áður ennþá gríðarlega mikla trú á honum.“

„Hann hefur aldrei brugðist mér á þeim tíma sem ég hef verið með landsliðið og ég veit að hann mun ekki hugsa um undanfarna leiki og einbeita sér núna að framtíðinni.“