Moyes opinn fyrir kaupum í janúar

David Moyes skoski knattspyrnustjóri Englandsmeistara Manchester United í fótbolta ætlar að reyna að styrkja liðið þegar leikmannaglugginn opnar í janúar. Moyes vill að hópurinn geti keppt um alla titla.

Moyes sem tók við Manchester United í sumar var gagnrýndur harðlega fyrir aðgerðarleysi á leikmannamarkaðnum í sumar og slaka byrjun á tímabilinu.

Moyes og Manchester United hefur rétt úr kútnum á síðustu vikum og nú er Moyes tilbúinn að láta til sín taka í janúar.

„Málið með þetta félag er að við horfum alltaf til langs tíma,“ sagði Moyes við fjölmiðla í aðdraganda leiksins gegn Cardiff í dag.

„Ég vil vera með lið sem getur keppt til sigurs í Meistaradeildinni og verið á toppnum í úrvalsdeildinni næstu fjögur til fimm árin.

„Það þarf að byggja á því sem fyrir er og við munum halda því áfram. Þú gerir heldur engar alsherjar breytingar í einum félagsskiptaglugga. Það þarf tvo til þrjá til að gera stórkostlegar breytingar,“ sagði Moyes.

„Það er ekki hægt tala um janúar og reyna að láta hann hljóma sem mánuðinn þar sem allt verður lagað og bætt. Þá er ég ekki að segja að ég ætli ekki að kaupa neitt í janúar. Við munum reyna hvað við getum en við kaupum ekki bara til þess að kaupa.

„Ef ekkert gengur í janúar þá verðum við að bíða fram á sumar til að reyna að fá þá leikmenn sem við viljum,“ sagði Moyes.

Manchester United sækir Aron Einar Gunnarsson og félaga í Cardiff heim klukkan 16 í beinni útsendingu Stöðvar 2 Sport 2.