Málaði yfir vegglistaverk og endaði sjálfur á veggnum

Borgarstarfsmaður í Lundúnum var fenginn til að mála yfir vegglistaverk sem málað hafði verið á vegg á EsseX Road. Grunlaus um að veggjalistamaðurinn væri að taka ljósmyndir af honum kláraði hann verkið, en skömmu síðar var nýtt listaverk komið á vegginn, mynd af borgarstarfsmanninum.

Maðurinn á bak við listaverkið kallar sig „DS“ og er 28 ára Lundúnarbúi. „Viðbrögð mín við því að það hefði verið málað yfir verkið voru öðruvísi en vanalega,“ segir „DS“ í samtali við Daily Mail, og bætir því við að hann sé orðinn vanur því að málað sé yfir verkin hans. „En í þetta sinn fékk það bara að vera í friði í átta klukkustundir.“

Hann ákvað því að taka ljósmyndir af manninum sem málaði yfir verkið og nota hann sem fyrirmynd að næsta verki. „Ég renndi í gegnum myndirnar og sá eina frábæra af manninum sem málaði yfir verkið. Ég vildi því setja hann á sama stað.“