Skatturinn gegn löggunni

Eignarhald nokkurra liða í efstu deild í Úganda er með óvenjulegasta móti. Police FC er til að mynda í eigu lögreglunnar þar í landi og URA í eigu skattsins, en URA stendur fyrir Uganda Revenue Authority. Tonny Mawejje, leikmaður ÍBV, lék með báðum þessum liðum.

Herinn á líka sitt lið en athyglisverðasti eigandinn er líklega eigandi liðsins Bunamwaya sem varð meistari fyrir þremur árum síðan.

Félagið, sem breytti nýverið um nafn og heitir í dag Vipers, er nefnilega í eigu formanns knattspyrnusambands Úganda.

Sá heitir Lawrence Mulindwa og hefur greinilega litlar áhyggjur af hagsmunatengslunum.