Ræktuðu mannseyra inni í rottu

Bandarískir vísindamenn hafa færst skrefi nær því að rækta nýtt eyra úr frumum sjúklinga, en samkvæmt frétt BBC, sem vitnar í nýlega fræðigrein, tókst vísindamönnunum í Boston að rækta nokkuð í líkingu við mannseyra úr frumum kúa og kinda.

Ef allt fer að óskum gæti þessi tækni nýst til að gera nýtt ytra eyra fyrir fólk sem er með afmynduð eyru, eða hefur misst eyra af slysförum.

Ferlið er þannig að lifandi frumur úr kúm og kindum var komið fyrir á lítilli vírgrind úr títani í laginu eins og mannseyra. Því var svo komið fyrir inni í líkama rottu þar sem það óx í tólf vikur, en ónæmiskerfi rottunnar hafði áður verið gert óvirkt svo að líkami hennar myndi ekki hafna eyranu sem aðskotahlut.

Dr. Thomas Cervantes, sem fór fyrir teyminu fagnaði niðurstöðunum sem hann sagði marka tímamót.

„Í fyrsta lagi tókst okkur að láta eyrað halda lögun sinni meðan það óx í tólf vikur inni í rottunni og auk þess tókst okkur að viðhalda sveigjanleika brjósksins.“

Cervantes sagði að næsta skref væri að gera tilraunir á fólki, en sennilega væru um fimm ár í það það gerðist.

Líffæraframleiðsla af þessu tagi er afar vaxandi grein innan læknisfræðinnar, en meðal annars hafa stofnfrumur verið notaðar til að græða barka í fólk, og nýra sem var búið til á rannsóknastofu og grætt í rottu, hefur gefið góða raun og virkað sem skildi.