Áframhald ofbeldisverka í Írak

Ofbeldisaldan heldur enn áfram í Írak þar sem átján manns létust í árásum í morgun og gærkvöldi. Annars vegar æddu byssumenn um götur í hverfi sjíta í höfuðborginni Bagdad og skutu fólk af handahófi með þeim afleiðingum að fimm létust og níu særðust. Tveir sjítar til viðbótar létust í álíka árás í úthverfi borgarinnar.

Þá voru gerðar sprengjuárásir bæði á moskur sjíta og súnníta í gærkvöldi. Þar sem sjö sjítar féllu í höfuðborginni og fjórir súnnítar í bænum Tuz Khormato í norðurhluta landsins.

Gríðarlegt mannfall hefur verið vegna ofbeldis í Írak síðustu mánuði, en um 3.000 manns hafa fallið í valinn frá því í apríl. Skemmst er að minnast þess að 58 létust í sprengjuárásum víða um landið í fyrradag. Al-Kaída í Írak sagðist bera ábyrgð á þeim árásum, sem beindust fyrst og fremst að sjítum.

Óöldin undanfarið hefur slegið á vonir manna um að ástandið í landinu fari að róast, nú þegar um tvö ár eru síðan bandarískar hersveitir yfirgáfu landið. Er talið að Al-Kaída sé með árásum á sjíta, sem eru meirihluti landsmanna og hafa tögl og hagldir í stjórn landsins, að æsa súnníta til uppreisnar.

Eftir innrás Bandaríkjamanna í Írak árið 2003 brutust út mikil átök milli trúarhópa þar sem unnin voru mikil grimmdarverk sem kostuðu fjölda fólks lífið áður en yfir lauk.