Brann í bústað eftir harðan skotbardaga

Christopher Dorner brann inni í fjallabústað eftir skotbardaga við lögreglu, tíu dögum eftir að hann framdi fyrstu morðin.

Lögreglan hafði leitað hans á þessum slóðum síðan á fimmtudag, þegar bifreið hans fannst brunnin og yfirgefin á bílastæði í San Bernardino-fjöllunum, skammt utan við Los Angeles.

Á mánudag komst lögreglan svo á sporið þegar Dorner stal bifreið. Eftir eltingarleik og árekstur þar sem skipst var á skotum komst Dorner undan á hlaupum. Nokkru síðar umkringdi lögregla fjallabústað, þar sem hann hafði komið sér fyrir. Enn kom til skotbardaga, sem kostaði einn lögreglumann lífið en annar særðist illa. Á endanum kviknaði í bústaðnum, sem var orðinn mettaður af táragasi. Þegar eldurinn var að mestu kulnaður fannst í bústaðnum brunnið lík.

Í fjölmiðlum vestan hafs og austan hefur vaknað grunur um að lögreglan hafi vísvitandi kveikt í bústaðnum með því að nota mikið af táragasi, sem vitað er að kviknað getur í. Birtar hafa verið orðréttar tilvitnanir í samtöl lögreglumanna, þar sem talað er um að „brenna kvikindið“.

Í margra blaðsíðna yfirlýsingu, sem Dorner hafði birt á Facebook-síðu sinni, sagðist hann búast við því að deyja í lokaátökum við lögregluna.

Hann lýsti þar yfir stríði gegn lögreglunni í Los Angeles og hótaði að drepa fjölda fólks til að vekja athygli á málstað sínum. Hann var ósáttur við að hafa verið vikið úr starfi árið 2009, stuttu eftir að hann sakaði starfsfélaga sinn um að hafa beitt ofbeldi við handtöku.

Í yfirlýsingunni sakar hann lögregluna í Los Angeles um kynþáttafordóma og fullyrti að ekkert hefði breyst síðan hópur lögreglumanna misþyrmdi blökkumanninum Rodney King árið 1991, en sjálfur var Dorner dökkur á hörund.

Alls hefur tíu daga hefndarherferð Dorners kostað fjögur líf, auk þess sem nokkrir hafa særst illa. Hann náði því fram að lögreglan í Los Angeles ákvað að hefja nýja rannsókn á tildrögum þess að honum var sagt upp á sínum tíma. Óvíst er þó hvað kemur út úr þeirri rannsókn.

gudsteinn@frettabladid.is