Myndband af slysinu á Spáni

Þjóðarsorg hefur verið lýst yfir á Spáni eftir að 77 manns fórust þegar farþegalest fór út af sporinu nærri Santiago de Compostela í norðvesturhluta landsins í gærkvöldi. Þetta er versta lestarslys á Spáni í yfir 40 ár.

Lestin var á hraðleið frá Madrid til hafnarborgarinnar Ferrol þegar alls 8 vagnar hennar fóru út af sporinu í beygju um 3 kílómetrum utan við Santiago de Compostela.

Á vefsíðu fréttamiðilsins El Mundo kemur fram að lestin hafi verið á 190 km hraða en þarna er hámarkshraði 80 kílómetrar á klukkustund. Eftir að vagnarnir fóru út af sporinu hlóðust þeir upp hver af öðrum.

Fréttaritari CNN, Ivetta Rubiera Cabrera, sem var komin á vettvang áður en lögreglu bar að, sagði þetta hroðalega aðkomu og fann hún enga líkingu aðra en þá að þetta væri eins og í stórslysamynd frá Hollywood. Jakobo Rodriguez, íbúi í Santiago de Compostela, var í áfalli þegar Reuters ræddi við hann í gærkvöldi.

Rodriguez segir þetta hafa verið skelfilegt að upplifa.

„Íbúar þessa friðsæla bæjar vissu ekki hvaðan á sig stóð veðrið, hvort um var að ræða árás á bæinn eða hvað? Og það sem var svo til þess fallið að auka á áfallið er að fyrir dyrum stóð bæjarhátíð, fiesta, í Santiago de Compostella en undirbúningur fyrir hátíðina stóð sem hæst þegar slysið varð.“

Björgunarmenn unnu á vettvangi slyssins í alla nótt og hafa 74 lík hafa fundist en 4 létust á sjúkrahúsi. Yfir 140 manns liggja slasaðir á sjúkrahúsum. Mariano Rajoy, forsætisráðherra Spánar, sem er fæddur í Santiago de Compostela er nú mættur á slysstað eftir neyðarfund ríkisstjórnarinnar, sem hann boðaði til þá er hann frétti af slysinu.

Eins og Jakobo Rodriquez kom inná stóð til að halda stærstu pílagrímshátíð Santiago de Compostela í dag og er von á þúsundum kristinna pílagríma til borgarinnar. Hátíðarhöldum hefur verið aflýst vegna slyssins.

Spænska lestarkerfið hefur almennt verið talið fremur öruggt og hefur miklum fjármunum verið varið í uppbyggingu þess.