Bandaríkjamaður dæmdur í 15 ára þrælkunarvinnu í Norður Kóreu

Bandarískur ríkisborgari hefur verið dæmdur til 15 ára þrælkunarvinnu í Norður Kóreu. Maðurinn var dæmdur fyrir glæpi gegn stjórnvöldum þar í landi og er málið talið tengjast mikilli spennu sem ríkir í samskiptum Norður Kóreu við Bandaríkin og Suður Kóreu.

Hinn 44 ára gamli Bandaríkjamaður, Kenneth Bae, kom til Norður Kóreu sem ferðamaður en var handtekinn í nóvember síðastliðnum. Síðan hefur hann verið í haldi af óljósum ástæðum og hafa bandarísk stjórnvöld reynt að fá manninn lausan. Nú í vikunni dæmdi Hæstiréttur Norður Kóreu hann hins vegar til fimmtán ára þrælkunarvinnu.

Bae var dæmdur fyrir glæpi gegn Norður-kóresku stjórninni, þótt ekki liggi ljóst fyrir í hverju glæpirnir felist. Er honum meðal annars gert að sök að hafa reynt að steypa ríkisstjórn Norður Kóreu af stóli. Aðgerðasinnar í Suður Kóreu hafa haldið því fram að hann gæti hafa verið handtekinn fyrir að taka ljósmyndir af sveltandi börnum í Norður Kóreu.

Norður Kóreumenn hafa handtekið nokkra bandaríska ríkisborgara á undanförnum árum, meðal annars blaðamenn og kristna trúboða, en þeir voru látnir lausir eftir afskipti æðstu manna í Bandaríkjunum.

Mikil spenna ríkir í samskiptum þjóðanna eftir að yfirvöld í Norður Kóreu hófu að þróa kjarnorkuflaugar og hóta árásum á Bandaríkin og Suður Kóreu fyrr á þessu ári. Undanfarnar vikur hefur færst aukinn þungi í hótanirnar en bandarísk stjórnvöld hafa hvatt Norður Kóreu til að láta Bae lausan af mannúðarsjónarmiðum.