Báðir miðverðir Valsmanna farnir - Halldór Kristinn í Keflavík

Valsmenn munu tefla fram tveimur nýjum miðvörðum í Pepsi-deild karla á komandi sumri því Halldór Kristinn Halldórsson er búinn að gera samning við Keflavík. Þetta kemur fram á vefsíðunni fótbolti.net.

Áður hafði fyrirliði Valsliðsins, Atli Sveinn Þórarinsson, samið við b-deildarlið KA. Saman léku þeir Halldór Kristinn og Atli Sveinn í miðvarðarstöðunum í 18 af 22 leikjum Vals síðasta sumar.

Halldór Kristinn er 24 ára gamall og var búinn að spila í tvö tímabil með Val eftir að hafa komið til félagsins frá Leikni. Hann spilaði 40 leiki fyrir Val í Pepsi-deildinni 2011 og 2012.

Grétar Sigfinnur Sigurðarson hefur verið orðaður við Val en honum hefur verið tilkynnt af þjálfara KR að félagið hafi ekki not fyrir hann næsta sumar.