Fara varlega að Obama

Innan fárra daga halda yfirmenn í þýsku leyniþjónustunni til Bandaríkjanna, að kröfu Angelu Merkel kanslara, til að ræða við fulltrúa Hvíta hússins og bandarísku Þjóðaröryggisstofnunarinnar um njósnamálin, sem skekið hafa stjórnvöld víða um heim undanfarnar vikur.

Sífellt fleiri upplýsingar koma nú fram um að bandarískir leyniþjónustumenn hafi njósnað um ráðamenn í hverju ríkinu á fætur öðru. Nú síðast skýrði breska blaðið The Guardian frá því að Bandaríkjamenn hefðu fylgst með símtölum 35 þjóðarleiðtoga, en reyndar hefðu þær njósnir ekki skilað neinum upplýsingum sem máli skiptu.

Hins vegar hafi njósnir þessar orðið til þess að bandarískir njósnarar fengu vitneskju um 43 önnur símanúmer, sem fylgst hefði verið með áfram.

Þetta kemur fram í einu þeirra leyniskjala, sem bandaríski uppljóstrarinn Edward Snowden lak til fjölmiðla.

Merkel Þýskalandskanslari skýrði frá því á miðvikudag að Bandaríkin hefðu hlerað einkasíma hennar. Fjölmiðlafulltrúi Hvíta hússins sendi í kjölfarið frá sér yfirlýsingu, þar sem hann fullyrti að Bandaríkin fylgdust ekki með símtölum Þýskalandskanslara og hafi ekki í hyggju að gera það. Í yfirlýsingunni sagði þó ekkert um það hvort Bandaríkin hefðu einhvern tíma gert það.

Merkel sagði trúnaðarbrest vera orðinn að veruleika í samskiptum þýskra og bandarískra ráðamanna, og því yrði að breyta. Hún vonast til að heimsókn þýsku leyniþjónustmannanna til Bandaríkjanna verði til þess að allt komi upp á borðið í þessum efnum.

Njósnamálin voru rædd á leiðtogafundi Evrópusambandsins í Brussel í gær, og samþykktu leiðtogarnir yfirlýsingu þar sem segir að trúnaðarbrestur geti skaðað nauðsynlega samvinnu ríkjanna á sviði njósna.

Á hinn bóginn lögðu þeir áherslu á að samskiptin við Bandaríkin skiptu Evrópuríki eftir sem áður miklu máli, og þetta mál mætti ekki verða til þess að spilla þeim samskiptum.

„Það sem hér er í húfi er að vernda tengsl okkar við Bandaríkin,“ sagði Francois Hollande Frakklandsforseti. „Það þarf að endurvekja og styrkja traustið.“