Tony Pulis hrifinn af fjallgöngum

Tony Pulis, eftirmaður Ian Holloway í knattspyrnustjórastólnum hjá Crystal Palace, horfir óhræddur fram á veginn þrátt fyrir erfiða stöðu liðsins í fallsæti ensku úrvalsdeildarinnar.

Tony Pulis var kynntur sem nýr stjóri í gær tveimur dögum eftir að Crystal Palace vann gríðarlega mikilvægan 1-0 útisigur á Hull. Pulis var þá í stúkunni en ekki tekinn við.

„Það búast allir við því að við föllum en það verður gaman að afsanna það," sagði Tony Pulis sem stýrði áður Stoke City í sjö ár.

„Ég er hrifinn af fjallgöngum og þetta verður erfitt verkefni sem ég ætla að njóta," sagði Pulis en hann hefur aldrei fallið sem knattspyrnustjóri.

„Fólk er ekki mikið að tala um það að ég hef komist upp úr öllum deildum, komist í bikarúrslitaleik og í 32 liða úrslit í Evrópukeppni," sagði Pulis.

Crystal Palace fékk til sín sextán nýja leikmenn í sumar en Pulis ætlar að styrkja liðið í janúarglugganum.

„Ég hef talað við Steve Parish (stjórnarformaður). Við eigum sex leiki fram að því að glugginn opnar eftir jól og þá er tækifæri til að kaupa og selja leikmenn. Við þurfum að skoða möguleika okkar í janúar en við þurfum að standa rétt að málum," sagði Pulis.