Rauða spjald Wes Brown líklega afturkallað

Það örugglega efast enginn um það að rauða spjaldið sem Sunderland-leikmaðurinn Wes Brown fékk um helgina á móti Stoke í leik í ensku úrvalsdeildinni hafi verið rangur dómur.

Wes Brown vann þá boltann án þess að koma við Charlie Adam en var af einhverjum furðulegum ástæðum sendur í sturtu af hinum 42 ára gamla dómara Kevin Friend.

Aganefnd enska knattspyrnusambandsins mun skoða þetta rauða spjald eftir að Sunderland-menn áfrýjuðu spjaldinu og BBC segir frá því að líklegast verði rauða spjaldið afturkallað. Wes Brown ætti þar með að sleppa við þriggja leikja bann.

Dómarinn Kevin Friend fær ekki að dæma leik í næstu tveimur umferðum vegna þessara mistaka en hann var þó ekki eini dómarinn sem gerði stór mistök í leikjum helgarinnar.

Ekkert verður hinsvegar aðhafst í málum Wayne Rooney hjá Manchester United og Kevin Mirallas hjá Everton sem báðir sluppu með gult spjald þegar þeir áttu að fá rautt.

Hörður Magnússon fór yfir þessa þrjá mjög svo umdeildu dóma í kvöldfréttum Stöðvar tvö í gær og má sjá þá frétt með því að smella á myndbandið hér fyrir ofan.