Leighton Baines tábrotnaði og missir af næstu leikjum

Leighton Baines, bakvörður Everton og enska landsliðsins, fór meiddur af velli í jafnteflinu á móti Liverpool um síðustu helgi og nú er komið í ljós að leikmaðurinn er tábrotinn.

Leighton Baines fór af velli eftir 50 mínútna leik en leikurinn á Goodison Park endaði með 3-3 jafntefli.

„Leighton er með brot í einu af beinunum í hægri fæti. Þetta gæti þýtt fjarveru frá tíu dögum upp í sex vikur. Það fer allt eftir því hversu vel þetta grær," sagði Roberto Martinez, knattspyrnustjóri Everton, við BBC.

„Þetta er á mjög sérstökum stað og við verðum bara að bíða og sjá til hvernig þetta þróast," bætti Martinez við.

Leighton Baines var búin að spila fyrstu 1039 mínúturnar á tímabilinu þegar hann varð að yfirgefa völlinn á laugardaginn. Hann er einn allra besti leikmaður Everton-liðsins og liðið mun sakna hans.

Everton mætir Stoke City um næstu helgi en svo bíða leikir á móti Manchester United og Arsenal í byrjun desember.