Kona sem skrifaði um líf sitt í Afganistan var myrt

Sushimita Banerjee lést í Afganistan af völdum skotsára síðastliðinn fimmtudag, 18 árum eftir að leiðtogar Talíbana dæmdu hana til dauða fyrir að neita að klæðast búrku á almannafæri.

Síðastliðinn fimmtudagsmorgun réðust grímuklæddir menn inn á heimili Banerjee og eiginmanns hennar í Paktika-héraði í austurhluta landsins. Árásarmennirnir bundu hjónin og fóru síðan með Banerjee en skildu eiginmann hennar eftir.

Lögreglustjóri Paktika sagði að mennirnir hefðu farið með hana í trúarskóla í þorpinu Sarrai Kala, þar sem hún var skotin 25 sinnum. Ekki er vitað hvers vegna hún var myrt.

Banerjee skrifaði um reynslu sína sem indversk kona gift manni frá Afganistan. Í fyrstu bók sinni fjallaði hún um að hún hefði verið ofsótt fyrir að neita að klæðast búrku. Hún náði síðar að flýja Afganistan eftir tvær misheppnaðar tilraunir.

Þegar hún kom til Indlands skrifaði hún sögu sína og var í kjölfarið gerð kvikmynd eftir henni undir heitinu Flóttinn frá Afganistan.

Heimamaður í Sarrai Kala sagðist hafa heyrt það frá ættingjum sínum að Talíbanar væru að leita að Banerjee. Þrátt fyrir að bæjarbúar væru fljótir að saka Talíbana um morðið hafa talsmenn þeirra neitað allri ábyrgð á dauða hennar. Sögðust þeir ekki taka fólk af lífi án dóms og laga.