Sannino tekur við Watford

Enska B-deildarliðið Watford hefur ráðið 56 ára gamlan Ítala, Giuseppe Sannino, sem knattspyrnustjóra liðsins.

Sannino á að baki sautján ára þjálfaraferil á Ítalíu og spilaði einnig lengi vel sjálfur með ítölskum félagsliðum á sínum tíma.

Sannino stýrði liði í efstu deild á Ítalíu í fyrsta sinn árið 2011 en þá tók hann við Antonio Conte sem stjóri Siena. Hann hélt liðinu uppi og kom því í undanúrslit ítölsku bikarkeppninnar.

Hann tók svo við Palermo í júní 2012 en var rekinn eftir að hafa stýrt liðinu í aðeins þremur leikjum. Hann var svo rekinn frá Chievo í síðasta mánuði eftir að hafa verið ráðinn þangað í sumar.

Sannino tekur við Watford af öðrum Ítala, Gianfranco Zola, sem sagði starfi sínu lausu á mánudaginn eftir en liðið hefur tapað síðustu fimm heimaleikjum sínum. Zola hafði stýrt Watford í eitt og hálft ár.