Tyrkland hættir við Eurovision vegna finnska kossins

Tyrkneska sjónvarpið hefur ákveðið að hætta við að sýna frá aðalkeppni  Eurovison á morgun. Ástæðan ku vera ótti við að finnska söngkonan Krista Siegrids muni kyssa kvenkyns dansara í beinni útsendingu, en lag hennar er ádeila á stöðu hjónabanda samkynhneigðra.

Tyrkland tekur ekki þátt í Eurovision í ár en tyrkneska sjónvarpið hafði þó fyrirhugað að sýna frá keppninni. Samkvæmt samtökum KAOS GL, sem berst fyrir réttindum samkynhneigðra í Tyrklandi, var hætt við að sýna keppnina  eftir að fréttir af kossi Kristu á æfingum ullu hneykslan í tyrkneskum fjölmiðlum.

Á vefsíðu sjónvarpsstöðvarinnar kemur fram að söngvakeppnin verði ekki sýnd vegna þess að búist sé við lélegu áhorfi. Talsmaður KAOS GL segir sjónvarpið nota lágar áhorfstölur sem afsökun, en í fyrra horfði einn afhverjum fjórum í Tyrklandi á Eurovision. Hann segir yfirvöld ritstýra tyrkneskum fjölmiðlum og gera í því að koma í veg fyrir ávinning í réttindabaráttu samkynhneigðra.

Kossinn fullkomlega eðlilegur

Finnska lagið ber nafnið ,,Marry Me", en Finnland er eina Norðurlandið sem hefur ekki lögleitt hjónabönd samkynhneigðra. Söngkonan Krista vill gera það sem hún getur til að koma boðskapi ástarinnar á framfæri. ,,Ástin er falleg í öllum sínum birtingarmyndum. Af hverju er eitthvað mál að tvær konur kyssist? Það ætti að vera fullkomlega eðlilegt“, segir hún.

Á opnunarhátíð Ólympíuleikana  í London 2012 var lesbískur koss sýndur í beinni útsendingu víðsvegar um heiminn, meðal annars í Sádi Arabíu og í Tyrklandi.  Það var í fyrsta sinn sem  mörg lönd sýndu samkynhneigðan koss í sjónvarpi.