Eriksen frá næsta mánuðinn

Svo gæti farið að Daninn Christian Eriksen, leikmaður Tottenham, verði frá keppni fram að jólum eftir að hann meiddist í landsleik í gær.

Danir unnu 2-1 sigur á Norðmönnum í vináttulandsleik í Herning í gær en Eriksen haltraði af velli undir lok fyrri hálfleiks, meiddur á ökkla.

„Við vitum ekki hversu lengi hann verður frá - hvort sem það eru fjórar eða sex vikur,“ sagði Morten Olsen, landsliðsþjálfari Dana, eftir leikinn í gær. „Þetta eru slæmar fréttir fyrir hann enda hjá nýju félagi,“ bætti hann við en Eriksen kom til Tottenham í sumar frá Ajax í Hollandi.