Yfir hundrað látnir í efnavopnaárás

Stjórnarandstæðingar í Sýrlandi segja að efnavopnaárás í bænum Arbín í Sýrlandi, rétt austan við höfuðborgina Damaskus, hafi kostað meira en hundrað manns lífið.

Þeir saka stjórnarherinn um að hafa beitt efnavopnum, en sýrlensk stjórnvöld segja ekkert hæft í því.

Myndir frá vettvangi sýna fjölda látinna, þar á meðal mörg börn. 

Rami Abdul-Rahman frá samtökum, sem hafa bækistöðvar í Bretlandi og nefnast Sýrlenska mannréttindaeftirlitið, segir ekki ljóst hvort efnavopn eða byssuskot hafi orðið fólkinu að bana. Önnur samtök segja greinileg merki þess sjást að efnavopnum hafi verið beitt.

Tuttugu manna sendinefnd frá Sameinuðu þjóðunum er nýkomin til Sýrlands til að kanna hvort efnavopn hafi verið notuð í borgarastríðinu þar.

Nokkra furðu vekur að stjórnarherinn skuli velja þennan tíma til að gera efnavopnaárás, en Frakkar hafa óskað eftir því að efnavopnahópur Sameinuðu þjóðanna fari til Arbin að kanna ummerki og komast að niðurstöðu um hvort efnavopn hafi verið notuð.