ESA vill að Íslendingar leyfi kjötinnflutning

Eftirlitsstofnun EFTA, ESA, hefur komist að þeirri niðurstöðu að bann Íslands við innflutningi á hráu kjöti standist ekki EES-samninginn. Málið gæti endað fyrir dómstólum, en Íslendingar hafa frest til loka maí til að gera betur grein fyrir afstöðu sinni.

Ríkisútvarpið skýrði frá þessu í kvöldfréttum sínum í gær.

Deilan snýst um íslensk lög um innleiðingu á reglugerðum Evrópusambandsins um matvæli og fóður, sem skuldbinda Íslendinga til þess að leyfa innflutning á hráu kjöti. Jón Bjarnason, þáverandi landbúnaðarráðherra, felldi þessa skuldbindingu út úr frumvarpinu áður en það varð að lögum. Árið 2011 sendu Samtök verslunar og þjónustu kvörtun til bæði Eftirlitsstofnunar EFTA og Umboðsmanns Alþingis vegna málsins. Umboðsmaður Alþingis taldi ekki ástæðu til að fjalla um málið fyrr en hugsanlega eftir að Eftirlitsstofnun EFTA hefði komist að niðurstöðu.

Eftirlitsstofnunin hefur tvisvar áður krafið íslensk stjórnvöld um skýringar á því hvers vegna bannið er svo afdráttarlaust í íslenskum lögum, í stað þess að gera ráð fyrir vægari takmörkunum á innflutningi.