Cantona: Beckham er sigurvegari

Eric Cantona, fyrrum liðsfélagi David Beckham hjá Manchester United, er viss um að Beckham nýtist Paris Saint-Germain vel í baráttunni um titlana í vor.

David Beckham hefur spilað þrjá leiki með Paris Saint-Germain síðan að hann samdi við félagið rétt áður en félagsskiptaglugganum lokaði í janúar. Hann var hinsvegar allan tímann á varamannabekknum á miðvikudagskvöldið þegar PSG tryggði sér sæti í átta liða úrslitum Meistaradeildarinnar.

Paris Saint-Germain er á toppi frönsku deildarinnar og er líka komið í átta liða úrslitin í franska bikarnum. Cantona segir að tilkoma Beckham munu hjálpi franska liðinu að landa þrennunni.

„Stórir leikmenn hafa mikla reynslu og þeir koma alltaf með eitthvað til liðsins," sagði Eric Cantona við The Sun.

„Beckham nær kannski ekki að spila alla leikina en reynsla hans mun nýtast liðinu vel," sagði Cantona.

„Hann gerir sér vel grein fyrir sinni ábyrgð og hann er sigurvegari sem kemur mikilvægum skilboðunum rétta leið til sinna liðsfélaga," sagði Cantona.