Enn eitt jafntefli West Ham og West Brom

Boðið var til markaveislu þegar West Ham og West Brom skildu jöfn 3-3 í hádegisleiknum í 19. umferð ensku úrvalsdeildarinnar í knattspyrnu í dag.

Heimamenn á Boylen Ground fengu óskabyrjun þegar Joe Cole kom uppeldisfélagi sínu á bragðið með skoti af stuttu færi. Heimamenn leiddu þar til fimm mínútur lifðu hálfleiksins. Þá tók Nicolas Anelka sig til og skoraði tvívegis á fimm mínútum og sá til þess að gestirnir frá Miðlöndum fóru með forskotið inn í leikhlé.

Modibo Maiga kom af bekknum í hálfleik og tuttugu mínútum síðar skoraði hann. Skotið var með vinstri fæti og utan teigs en Ben Foster átti að einfaldlega að verja skotið. Ekki batnaði ástandið fyrir Foster þegar hann hirti knöttinn á nýjan leik úr netinu tveimur mínútum síðar. Þá skoraði Kevin Nolan af stuttu færi eftir þunga sókn Hamranna.

Stuðningsmenn heimamanna í stúkunni voru enn að blása sápukúlur af fögnuði þegar Saido Berahino jafnaði metin með hnitmiðuðu skoti úr teignum sem fór af stönginni og inn. Jussi Jääskelaäinen hefði líklega átt að gera betur í marki heimamanna.

Liðin fengu því eitt stig á mann sem gerir ekki neitt fyrir liðin í töflunni. West Brom er áfram í 15. sæti og West Ham í 19. sæti. Fyrra liðið hefur ekki unnið í síðustu níu leikjum og hið síðara í síðustu sex. West Brom hefur gert átta jafntefli á leiktíðinni og West Ham fimm.