Arsenal vill festa Wenger til ársins 2017

Enska úrvalsdeildarliðið Arsenal hefur boðið knattspyrnustjóra sínum Arsene Wenger nýjan samning sem mun gilda til ársins 2017.

Samningurinn hefur verið á borðinu í rúman mánuð en talið er að Wenger verði tilbúinn að framlengja samning sinn við félagið fljótlega eftir áramót.

Arsenal er á toppi ensku úrvalsdeildarinnar þrátt fyrir 6-3 tapið gegn Manchester City í gær en Arsenal hefur ekki unnið titil undir stjórn Wenger síðan liðið varð bikarmeistari 2005.

Liðið hefur engu að síður náð mjög góðum árangri undir stjórn Wenger sem tók við liðinu árið 1996. Undir hans stjórn hefur liðið í þrígang hampað Englandsmeistarartitlinum og fjórum sinnum orðið bikarmeistari auk þess sem liðið hefur átt fast sæti í Meistaradeild Evrópu.