Phil Neville vill ekki fara heim til sín

Einn af strákunum úr 92-árgangi Man. Utd, Phil Neville, er nú hluti af þjálfarateymi félagsins og hann gæti ekki verið ánægðari með að vera farinn að vinna aftur fyrir félagið.

Neville, sem spilaði í tíu ár fyrir félagið, segir að síðustu mánuðir hafi verið draumi líkastir.

"Ég er að gera það sem mig hefur alltaf langað til að gera. Ég mæti í vinnuna klukkan hálf sjö og er svo síðasti maður heim. Ég vil ekki fara heim," sagði Neville og bætti við.

"Við erum með rúm á æfingasvæðinu. Ég segi stundum við konuna mína á kvöldin að ég hafi ekki viljað koma heim. Þá er ég alls ekki að tala niður til konunnar minnar. Mér líður bara svona vel í vinnunni. Æfingasvæðið er eins og heimili."