Defoe vill ekki fara frá Spurs

Framherjinn Jermain Defoe er ekki sáttur við sína stöðu hjá Tottenham en þrátt fyrir það hefur hann ekki áhuga á því að yfirgefa félagið.

Defoe hefur aðeins verið einu sinni í byrjunarliði Spurs í deildinni í vetur. Hann hefur komið sjö sinnum af bekknum og á enn eftir að skora í deildinni í vetur.

Hann hefur aftur á móti fengið að spila í Evrópudeildinni og deildabikarnum. Þar hefur hann skorað níu mörk í sjö leikjum.

"Auðvitað er pirrandi að fá ekkert að spila í deildinni þó svo ég sé að skora mikið. Það er eðlilegt að ég vilji spila mikið," sagði Defoe.

"Ég hef aldrei sagt að ég vilji fara. Þegar ég fór áður frá liðinu þá vildi ég ekki fara. Ég vil bara spila. Ég myndi frekar biðja stjórann um tækifæri en sölu. Það vita allir að ég elska þetta félag."