Ógnvekjandi barn í frumlegum hrekkjavökubúning

Það hefur færst í vöxt á Íslandi að fólk haldi upp á Hrekkjavöku (e.Halloween) og klæði sig í búninga í tilefni vökunnar, þetta hefur verið sérstaklega vinsælt meðal yngri kynslóðarinnar. Hátíðin verður haldin fimmtudaginn eftir viku víða um heim.

Á myndbandinu hér að neðan má sjá barn klætt upp af frumlegum foreldrum sínum. Barnið er í heldur óvenjulegum og ógnvekjandi búning. Á vefsíðunni Gizmodo segir að vonandi hafi fólk ekki eytt síðustu sex mánuðum í að útbúa búninga í því skyni að vekja athygli fyrir frumlegasta búninginn, því vinningshafinn sé augljóslega litla barnið í myndbandinu.

Á vísindavef Háskóla Íslands kemur fram að Hrekkjavaka sé alltaf haldin 31. október og er þetta vakan fyrir Allraheilagramessu. Upphaflega var Allraheilagamessa haldin 1. maí ár hvert en árið 834 var dagsetning messunnar færð til 1. nóvember.

Á vísindavefnum segir að í mörgum evrópskum lögnum, þar á meðal Íslandi, hafi árinu verið skipt í tvær árstíðir en ekki fjórar. Vetur og sumar. Á Íslandi til forna var haldin hátíð í lok október sem kölluð var veturnætur.

„Upphaf vetrar og árs er það sem kallað er „liminal“ tímabil, einhvers konar millibilsástand sem ríkir á tímum mikilla umskipta. Þá geta menn jafnvel skynjað handanheima; þeir sjá drauga og álfa, og geta spáð í framtíðina,“ segir á vefnum og þar segir að greinilegt sé að andar voru taldir vera á kreiki á á veturnóttum, sem haldin var hér á landi.