Norska knattspyrnusambandið í mál vegna útsendingarinnar á leiknum

Norska knattspyrnusambandið ætlar í mál við sjónvarpsstöðina TV2 vegna þess að forsvarsmenn stöðvarinnar, ákváðu að sýna leik Noregs og Íslands í undankeppni heimsmeistaramótsins, á annarri stöð en samið hafði verið um. Þetta kemur fram í norska blaðinu Aftenposten.

Leikurinn á þriðjudag átti að vera sýndur á aðalrás TV2 en þar sem Norðmenn voru dottnir úr leik í undankeppni HM, ákváðu forsvarsmenn sjónvarpsstöðvarinnar að sýna leikinn á hliðarrásinni TV2 Zebra. Þótt 364 þúsund manns hafi horft á leikinn telur norska knattspyrnusambandið að samningar hafi verið brotnir og ætla því í mál.

Áhorfið á leikinn var mun meira en búist hafði verið við og meira en á aðalrásina þetta kvöldið, en um 281 þúsund horfðu á þá rás.

„Við munum fylgja þessu eftir,“ segir Svein Graff varaforseti Norska knattspyrnusambandsins. Aðspurður hvort þeir myndu fara fram á bætur svarar hann því að þeir ætli að ræða við forsvarsmenn TV2 og síðan fara með málið fyrir dóm.

„Það er mjög alvarlegt að okkar aðalsamstarfsaðili brjóti svona kristaltærar reglur og samning sem þeir vita alveg út á hvað gengur,“ segir Svein Graff.

Yfirmaður fótboltadeildar TV2, Elaine Jansen Hagen, sagði í gærmorgun að hún hefði ekkert heyrt frá knattspyrnusambandinu en þau muni taka á því máli þegar þar að kemur.