Nánast fullt í flug 666 til HEL

Flugfarþegar í Skandinavíu virðast ekki láta hjátrú tengda föstudeginum þrettánda stöðva sig. Það er nánast fullt í flug 666 frá Kaupmannahöfn til Helsinki í dag, en skammstöfun áfangastaðarins er HEL.

„Við flugmennirnir höfum grínast mikið með þetta,“ segir Juha-Pekka Keidasto flugstjóri en hann er að eigin sögn ekki hjátrúarfullur. „Fyrir mér er þetta bara tilviljun.“

Mikil hjátrú er tengd tölunni 13 og eins og flestir vita er föstudagurinn þrettándi talinn boða ógæfu í mörgum samfélögum. Einnig telja ýmsir töluna 666 vera merki djöfulsins. Í vélum sumra flugfélaga, til dæmis Scandinavian Airlines, er engin sætaröð með númerinu 13 vegna hjátrúarinnar, en þetta er nýtilkomið að sögn Ulo Valk, prófessors í þjóðsagnafræði við háskólann í Tartu í Eistlandi.

„Fyrir minna en hundrað árum hafði talan 13 ekki neikvæða merkingu á norðurslóðum en það hefur breyst,“ segir Valk. „Það er talað um tólf tíma, tólf mánuði og svo auðvitað um hina tólf lærisveina Jesú. Að bæta einum við er talið skapa glundroða.“