Svanur drottningar finnst grillaður á bökkum Thames

Svanur í eigu Englandsdrottningar fannst brunninn í vinsælum almenningsgarði í námunda við Windsor kastala í dag. Fuglinn hafði verið steiktur í hamnum en kjötið fjarlægt af hræinu. 

Það voru starfsmenn garðarins sem fundu hræið um klukkan þrjú að breskum tíma og hringdu þeir samstundis í hjálparlínu sem hugar að veikum og slösuðum fuglum sem finnast í kringum ána Thames. 

„Þeir voru bara í sínum hefðbundna göngutúr þegar þeir hringdu í okkur og sögðust hafa fundið eitthvað sem líktist grilluðum svani," sagði Wendy Hermon hjá hjálparlínunni í samtali við Sky News.

„Þetta er algjör viðbjóður. Við höfum heyrt sögur af svona verknaði en við höfum aldrei séð þetta áður," bætti Wendy við. 

David Barber, sem sér um að halda utan um og merkja svani drottningarinnar, blöskraði atvikið og segir lögregluna vera að rannsaka málið. 

„Allir svanir eru álitnir konunglegir og fólk fær algjört áfall þegar það sér eitthvað þessu líkt á opnu svæði í almenningsgarði," sagði Barber, og bætti við að nánast allir svanir á bökkum Thames séu í eigu drottningarinnar. 

Hinir seku eiga yfir sér allt að sex mánaða fangelsi og um 5000 punda sekt þar sem svanir eru verndaðir fuglar. Barber segir þó að ef breska krúnan gengst við svaninum gætu hinir seku verið ákærðir skemma eign bresku krúnunnar.

Þess má geta að á Íslandi eru svanir alfriðaðir.