Brutust aftur inn og skiluðu þýfinu

Innbrotsþjófar létu greipar sópa á skrifstofu í borginni San Bernandino í Kaliforníu og höfðu á brott með sér sex borðtölvur og fartölvu. En þegar þeir gerðu sér grein fyrir því að skrifstofan var í raun þjónustumiðstöð fyrir þolendur kynferðisofbeldis komu þeir aftur með tölvurnar og skiluðu þeim.

„Við erum enn í sjokki,“ segir Candy Stallings, yfirmaður þjónustumiðstöðvarinnar, en hún fékk símtal frá öryggisþjónustufyrirtæki um hálfellefuleytið að kvöldi 31. júlí þar sem henni var sagt að þjófavarnakerfið hefði farið í gang og lögreglan væri á leiðinni.

Þegar Stallings kom á staðinn fékk hún þær upplýsingar frá lögreglu að innbrotsþjófar hefðu brotið sér leið inn á skrifstofuna í gegn um þakið. Skemmdirnar sem þeir ollu við innbrotið eru metnar á því sem nemur rúmlega hálfri milljón króna.

„Við héldum að við myndum aldrei jafna okkur á þessu. Hver einasta tölva sem við eigum er starfi okkar svo mikilvæg,“ bætir Stallings við.

Eftir að lögregla fór af vettvangi fór Stallings aftur heim og reyndi að sofa. Nokkrum klukkustundum síðar fékk hún annað símtal, og nú frá lögreglunni, um það að öryggiskerfið hefði greint mannaferðir.

En þegar á staðinn var komið kom í ljós að þjófarnir höfðu brotist inn aftur og skilað öllum tölvunum til baka. Einnig höfðu þeir skilið eftir afsökunarbeiðni á miða.

„Við höfðum ekki hugmynd um hverju við vorum að stela,“ sagði í bréfinu. „Hér er dótið ykkar og vonandi getið þið haldið áfram að láta gott af ykkur leiða. Guð blessi ykkur.“

Stallings segist hafa fengið gæsahúð við lestur bréfsins. „Eina mínútu var allt dótið horfið og þá næstu var það allt komið til baka. Þeir sem brutust inn fengu bakþanka. Þeir höfðu einhverja samkennd.“

Til stendur að ramma afsökunarbeiðnina inn á skrifstofunni og hefur saga þjónustumiðstöðvarinnar vakið mikla athygli. Þá hefur fjöldi fólks lagt sitt af mörkum við að bæta tjónið sem hlaust af innbrotinu með fjárframlögum.