Lestarstjórinn montaði sig af hraðanum á Facebook

Lögreglan í Galisíu á Spáni hefur handtekið lestarstjórann Francisco Jose Garzon Amo, en hann stýrði farþegalestinni sem fór út af sporinu í fyrradag með þeim afleiðingum að tugir létust.

Nú er komið í ljós að lestarstjórinn, sem er 52 ára, setti inn stöðuuppfærslu á Facebook í mars í fyrra þar sem hann montaði sig af því að aka samskonar lest langt yfir hámarkshraða.

Meðfylgjandi var mynd sem sýndi lestina á 200 kílómetra hraða á klukkustund. Facebook-síðu lestarstjórans hefur nú verið lokað.

The Guardian greinir frá þessu í dag.

Rannsókn á orsökum lestarslyssins fór á fullt skrið í gær og beindist hún strax að umræddum lestarstjóra. Í yfirheyrslu viðurkenndi hann að lestin hefði verið á tvöföldum hámarkshraða þegar hún fór út af sporinu, eða á 190 kílómetra hraða á klukkustund, en á staðnum er 80 kílómetra hámarkshraði. 

Maðurinn hefur starfað í þrjátíu ár hjá lestarfélaginu og keyrt leiðina í rúmlega ár. 

Lestin sem um ræðir fór í gegnum eftirlit að morgni slysdagsins þar sem hún var sögð vera í fullkomnu ástandi. 

Í gær var lýst yfir þriggja daga þjóðarsorg á Spáni. Lestarslysið er það versta í landinu í yfir fjörtíu ár.