Sænskur framherji til Valsmanna

Lucas Ohlander, tvítugur framherji frá Svíþjóð, hefur samið við Valsmenn út leiktíðina. Þetta kemur fram í sænskum fjölmiðlum í dag.

Ohlander hefur verið á mála hjá Helsingborg hjá Svíþjóð frá árinu 2010. Hann hefur þó ekki náð að vinna sér fast sæti í liðinu og verið lánaður til annarra félaga.

Valsmenn hafa átt erfitt uppdráttar í sóknarleik sínum undanfarnar vikur. Liðið hefur ekki unnið sigur í síðustu fimm umferðum en síðasti sigurleikurinn í deildinni kom norðan heiða gegn Þór þann 9. júní.

Björgólfur Takefusa hefur yfirgefið herbúðir Vals eftir brot á agareglum liðsins og Kolbeinn Kárason séð um framherjastöðuna í undanförnum leikjum. Indriði Áki Þorláksson kom þó inn á sem varamaður gegn Fylki á dögunum og skoraði gott mark.

Valur tekur á móti ÍA í 13. umferð Pepsi-deildar í kvöld. Leikurinn er í beinni á Stöð 2 Sport.