Varnarleikurinn varð okkur að falli

„Við gerðum okkur seka um slæm mistök, sérstaklega í hornum sem ég hafði lagt mikla áherslu á að stöðva,“ sagði Lars Lagerbäck í leikslok.

„Mér fannst liðið í heild verjast illa ólíkt því sem við gerum venjulega. Slóvenar fengu líka góð færi í fyrri hálfleiknum og það kom mér á óvart hve opinn hálfleikurinn var,“ sagði Svíinn.

Lagerbäck benti á að Ísland hefði skapað sér gnótt færa. Þrjú strax á upphafsmínútunum en þau hefði ekki tekist að nýta. Sömu sögu væri að segja um færi sem sköpuðust í síðari hálfeiknum.

Sá sænski sagði fjórða markið hafa komið eftir slæman varnarleik af hálfu íslenska liðsins.

„Þá vorum við byrjaðir að taka áhættu. Því miður gagnast sjaldnast að taka áhættu eins og kom berlega í ljós í kvöld.“

Þriðja mark Slóvena kom eftir hornspyrnu. Aðspurður hvað hefði farið úrskeiðis í markinu sagði Svíinn:

„Við spilum svæðisvörn í hornum en það réðst enginn á boltann. Mér sýndist boltinn fara yfir hausinn á Helga Val og þá átti einhver að vera mættur til að gera árás á boltann.“

Albanía og Noregur skildu jöfn í hinum leik kvöldsins. Svíinn var ánægður með úrslitin.

„Ég sagði leikmönnum frá því að þau úrslit væru jákvæð,“ sagði Lagerbäck á skemmtilegri nótum. Hann lagði áherslu á að riðillinn væri galopinn og öll liðin, nú líka Slóvenía, gætu nælt í annað sætið.