Markmannsmistök, skotgleði og sjálfsmarkakóngurinn

Hvers skoraði flest sjálfsmörk? Hver skaut oftast framhjá? Hvaða markvörður varði flest skot? Hver braut oftast af sér? Það er kominn tími til að gera upp 21. leiktímabilið í ensku úrvalsdeildinni í knattspyrnu.

Líkast til kemur það fáum á óvart að ekkert lið braut oftar af sér en Stoke. Liðsmenn Tony Pulis fengu 485 aukaspyrnur dæmdar á sig þótt brotakóngurinn hafi verið Grant Holt hjá Norwich (82 brot). West Ham kom næst á eftir og fráfarandi Englandsmeistarar nokkuð óvænt þriðju.

Arsenal sankaði að sér flestum rauðum spjöldum eða fimm en flest gulu spjöldin fóru, já þú giskaðir rétt, til Stoke (78). Luis Suarez, Matthew Lowton, Bradley Johnson og Craig Gardner hlotnuðust sá vafasami heiður að fá nafn sitt oftast ritað aftan á gula spjaldið eða tíu sinnum.

Englandsmeistarar Manchester United settu met. Í 15 leikjum af 38 lentu þeir undir á leiktíðinni en tókst að næla í 29 stig úr leikjunum 15. Metið var í eigu Newcastle frá tímabilinu 2001-2002, undir stjórn Bobby Robson, sem náði í 24 stig úr leikjum sem liðið lenti undir í.

Newcastle skoraði flest mörk í viðbótartíma og var Senegalinn Papiss Cissé fremstur í flokki. Cissé skoraði sigurmörk í leikjum gegn Fulham, Stoke og West Brom en Robin van Persie kom næstur með mörkum sínum gegn Manchester City og Southampton.

Gareth Bale átti flest skot sem hittu á markið (73) en fast á hæla honum kom Luis Suarez (72). Úrúgvæinn kemur víða við þegar leiktímabilið er gert upp hvað tölfræði varðar. Suarez átti nefnilega líka langflest skot framhjá (71) en Spánverjinn Michu setti 54 upp í stúku.

Liðsfélagi Michu hjá Swansea, framherjinn Itay Shechter, átti verstu tölfræðina yfir tíma sem leið á milli skottilrauna. Shechter skaut aðeins fjórum sinnum að marki á 621 mínútum á vellinum eða skot á 155 mínútna fresti. Aðeins 22% skot Cameron Jerome hjá Stoke hittu markið og Mario Balotelli skoraði aðeins eitt mark úr 26 tilraunum sem er 4 prósent nýtni.

Erfitt er að nefna leikmann sem var liði sínu mikilvægari en Belginn Christian Benteke. Framherjinn skoraði eða lagði upp 49 prósent marka Aston Villa. Til samanburðar dreifðust mörk Manchester United á leiktíðinni á tuttugu leikmenn.

Leighton Baines hjá Everton var sá eini sem spilaði alla leikina 38 og var aldrei skipt af velli. Hann skapaði líka 116 færi fyrir liðsfélaga sína en fróðlegt verður að sjá hvort David Moyes reyni að stela bakverðinum hárprúða til Mancester United. Matt Jarvis hjá West Ham kom félögum sínum í 46 færi án þess að þeim tækist að skora mark.

Juan Mata hjá Chelsea var stoðsendingakóngur ársins sem rétt væri að nefna „matari“ ársins til heiðurs Spánverjanum smávaxna. Mata lagði upp tólf mörk en á hæla honum kom Santi Cazorla og Eden Hazard með ellefu „matanir“. Mata (12 mörk, 12 stoðsendingar), Theo Walcott (14 mörk, 10 stoðsendingar), Cazorla (12 mörk, 11 stoðsendingar) og Wayne Rooney (12 mörk, 10 stoðsendingar) náðu tveggja stafa tölu hvað varðar mörk og stoðsendingar.

Tottenham nældi í 72 stig sem dugðu liðinu aðeins í 5. sæti. Stigafjöldinn hefði dugað Lundúnarliðinu í 2. sætið tímabilið 2010-2011 og er met hjá liði sem hafnar utan fjögurra efstu sætanna. Ekkert lið skoraði fleiri mörk fyrir utan vítateiginn en Tottenham og átti Gareth Bale stærstan hlut að máli. Walesverjinn skoraði níu sinnum fyrir utan vítateiginn en aukaspyrnukóngurinn var Rob Snodgrass hjá Norwich með þrjú aukasprnumörk. Stoke skoraði aðeins eitt mark með skoti utan teigs.

35 leikjum á leiktíðinni lauk með markalausu jafntefli og 47 sinnum settu leikmenn boltann í rangt mark sem er met. Jos Hooiveld hjá Southampton var sjálfsmarkakóngurinn með þrjú sjálfsmörk en fékk samkeppni frá Nathan Baker, Gareth McAuley og Jonathan Walters. Walters skoraði mörkin sín í sama leiknum. *OG, sem reyndist Manchester United mikilvægur á síðustu leiktíð, skoraði sex sinnum fyrir þá rauðklæddu í vetur.

Jussi Jaaaskelainen hjá West Ham varði flest skot allra eða 164 og hélt ellefu sinnum hreinu. Joe Hart gerði það þó oftast eða í 18 leikjum. Hart gerði þó fimm mistök sem leiddu til marka þótt Ali al-Habsi hjá Wigan hafi lagt hann að velli í keppninni óvinsælu. Sjö sinnum gerði Ómanmaðurinn dýrkeypt mistök.

*OG = own goal; Það vakti mikla athygli hve oft sjálfsmörk voru skoruð af andstæðingum Manchester United leiktíðina 2011-2012

Samantektin er byggð á tölfræði frá Opta og grein Jacob Steinberg á Guardian.