Fremsti hönnuður Apple vinnur að þróun snjallúrs

Líklegt þykir að tæknirisinn Apple muni svipta hulunni af nýstárlegu snjall-úri seinna á þessu ári. Fregnir herma að sjálfur Jonathan Ive, helsti hönnuður Apple, hafi umsjón með verkefninu.

Síðustu misseri hefur þrálátur orðrómur verið á kreiki um snjall-úr Apple. Fréttaveitan Bloomberg greinir frá því í dag að frumgerð úrsins sé nú í prófunum.

Talið er að úrið muni keyra breytta útgáfu af iOS stýrikerfinu sem finna má í iPhone snjallsímunum og iPad spjaldtölvunni. Markmið Ive og þeirra verkfræðinga sem koma að verkefninu er að tryggja hagkvæma orkunýtingu tækisins, það er, svo að neytendur þurfi ekki að hlaða það á hverjum degi.

Þá er talið að Apple muni kynna úrið til leiks á svipuðum tíma og Google hyggst frumsýna snjall-gleraugun Google Glass.