Beckham ánægður með fyrsta leikinn

David Beckham lék sinn fyrsta leik fyrir PSG í gær er hann spilaði síðustu sextán mínútur leiksins gegn Marseille. PSG vann leikinn 2-0.

Beckham átti stóran þátt í seinna marki franska liðsins og gat því ekki kvartað þó svo hann hafi viðurkennt að hafa verið stressaður fyrir leikinn.

"Þetta er auðvitað frábær byrjun fyrir mig. Það var gott að komast út á völlinn en mér líður eins og ég hafi skrifað undir fyrir löngu síðan," sagði Beckham eftir leikinn.

"Stjórinn bað mig um að reyna að halda boltanum og róa leikinn niður. Vonandi gekk það upp hjá mér."

Beckham setur eðlilega stefnuna á að vinna sér fast sæti í byrjunarliði PSG. Hann verður hugsanlega í liðinu er þessi lið mætast aftur í bikarnum á miðvikudag.

"Það er alltaf erfitt að koma nýr inn eftir áramót og aldurinn hjálpar mér ekki. Ég ætlast ekki til þess að fá beint sæti í byrjunarliðinu en það er það sem maður stefnir að.

"Ég er stoltur að vera hluti af þessu liði. Ég mun taka þetta skref fyrir skref. Vonandi næ ég að gera gæfumuninn einstaka sinnum fyrir liðið."