Jóhann Berg skoraði þegar AZ sló út Ajax

Jóhann Berg Guðmundsson og félagar í AZ Alkmaar eru komnir í úrslitaleik hollensku bikarkeppninnar í fótbolta eftir 3-0 sigur á Ajax í Íslendingaslag í undanúrslitum keppninnar í kvöld. Jóhann Berg skoraði annað mark AZ í leiknum.

Kolbeinn Sigþórsson og Jóhann Berg komu báðir inn á sem varamenn í leiknum, Kolbeinn á 69. mínútu og Jóhann Berg á 83. mínútu.

Bandaríkjamaðurinn Jozy Altidore skoraði fyrsta markið á 74. mínútu en Jóhann Berg bætti við öðru marki aðeins fimm mínútum eftir að hann kom inn á sem varamaður. Altidore lagði upp markið fyrir Jóhann Berg og skoraði síðan þriðja markið sjálfur í uppbótartíma.

Þetta eru mjög óvænt úrslit enda er AZ ellefu sætum og 23 stigum á eftir Ajax-liðinu í hollensku deildinni.

AZ mætir PSV Eindhoven í bikarúrslitaleiknum en PSV vann 3-0 sigur á PEC Zwolle fyrr í kvöld.