Ólafur Ingi og félagar unnu toppslaginn

Ólafur Ingi Skúlason spilaði allan leikinn þegar Zulte-Waregem vann 1-0 útisigur á Anderlecht í toppslag belgísku úrvalsdeildarinnar í fótbolta í kvöld en með þessum sigri minnkaði Zulte-Waregem forskot Anderlecht í sex stig.

Zulte-Waregem er nú með 57 stig á móti 63 stigum hjá Anderlecht en á auk þess leik inni. Anderlecht hefði stigið stórt skref í átta að titlinum með sigri í kvöld en liðið hefði getað náð tólf stiga forskoti.

Frakkinn Franck Berrier skoraði eina mark leiksins á 72. mínútu eftir sendingu frá Belganum Jens Naessens. Ólafur Ingi lék í stöðu afturliggjandi miðjumanns á þriggja manna miðju Zulte-Waregem.

Zulte-Waregem er nú búið að vinna fimm af síðustu sex leikjum sínum (eitt jafntefli) og hefur aðeins fengið á sig tvö mörk í þessum sex leikjum. Liðið er búið að vinna upp fimm stig á Anderlecht í síðustu tveimur leikjum.