Einn fágætasti hvalur heims sást í fyrsta sinn

Vísindamenn hafa komist að því að tveir hvalir, sem rak á strönd við Nýja-Sjáland á gamlárskvöld árið 2010, hafi verið af einni fágætustu hvalategund heims.

Í fyrstu var talið að hvalirnir, fimm metra langt kvendýr og þriggja metra langur kálfur hennar, væru af annarri tegund andarnefja, sem algeng er í Suðurhöfum. Þeir voru því urðaðir við fyrsta tækifæri.

Það var ekki fyrr en sýni, sem tekin höfðu verið úr þeim, höfðu verið rannsökuð af vísindamönnum sem í ljós kom að þarna hefði verið blaðtennt andarnefja á ferðinni, en sú hvalategund hefur aldrei sést á lífi.

Tvisvar áður hafa fundist beinagrindur af þessari hvalategund, en sáralítið er vitað um lifnaðarhætti hennar annað en að hún hefst við á miklu dýpi í Suður-Kyrrahafi og nærist einkum á smokkfiski.

„Þetta er býsna stórkostlegt,“ segir Ewan Fordyce, prófessor við Otago-háskólann á Nýja-Sjálandi. „Fáar, ef nokkrar, tegundir spendýra á jörðunni eru fágætari en þessi.“

Eftir að rannsóknir á sýnunum höfðu leitt í ljós sannleikann, fóru vísindamenn á staðinn til að grafa upp leifar dýranna. Frekari rannsóknir hafa síðan staðfest að þarna er þessi fágæta hvaltegund á ferðinni.- gb