Faðir Rooney verður ekki kærður

Wayne Rooney eldri verður ekki kærður fyrir að hafa tekið þátt í að hagræða úrslitum knattspyrnuleikja í Skotlandi, eftir því sem lögfræðingur hans sagði í dag.

Rooney var handtekinn í október síðastliðnum og lögreglan gerði húsleit á heimili hans í Liverpool. Átta aðrir voru handteknir vegna rannsóknarinnar en einn þeirra var Steve Jennings, leikmaður Motherwell.

Voru þeir sakaðir um að hafa reynt að hagræða úrslitum í leik Motherwell og Hearts árið 2010 til að hagnast á veðmálastarfssemi í kringum leikinn.

Lögfræðingurinn sagði að Rooney hefði ávallt haldið fram sakleysi sínu og að lögreglan hafi tilkynnt honum að ekkert frekar yrði gert gagnvart honum í þessu máli. Slíkt hið sama var tilkynnt Jennings um helgina.