Margir vildu afbrigðilegt kynlíf

Leikkonan María Birta Bjarnadóttir hefur höfðað skaðabótamál á hendur 25 ára gamalli konu sem setti auglýsingu í nafni Maríu inn á vefinn Einkamál. Hún krefst hálfrar milljónar króna í bætur auk málskostnaðar.

Samkvæmt heimildum Fréttablaðsins snýst málið um auglýsingu sem konan, sem María Birta þekkti, setti inn á stefnumótavefinn Einkamál í september í fyrra. Auglýsingin var í nafni Maríu og þar var boðin afbrigðileg kynlífsþjónusta af ýmsu tagi. Með fylgdi bæði mynd af Maríu og símanúmer hennar.

Á einni klukkustund fékk María Birta sautján símtöl frá mönnum sem vildu þekkjast boðið. Morguninn eftir biðu hennar svo fjögur SMS-skeyti. Alls skoðuðu yfir 300 manns auglýsinguna.

María Birta kærði málið til lögreglu, sem rannsakaði það og tók skýrslu af stúlkunni, sem gekkst við því að hafa sett inn auglýsinguna. Málið leiddi hins vegar ekki til refsingar og því ákvað María Birta að höfða einkamál.

Hún telur auglýsinguna ólöglega meingerð gegn æru sinni og friði, enda hafi hún upplifað mikið varnarleysi, misst nokkra daga úr vinnu og orðið af tveimur flugnámstímum vegna andlegs áfalls og þurft að skipta um símanúmer, sem hafi tengst atvinnurekstri hennar – en María rekur verslunina Maníu.

María Birta, sem fór með eitt aðalhlutverkanna í kvikmyndinni Svartur á leik, vildi ekki tjá sig um málið þegar Fréttablaðið hafði samband við hana og vísaði á lögmann sinn. Hún kvað málið þó ekki vera viðkvæmt.

Hjálmar Blöndal, lögmaður Maríu, staðfesti að málið hefði verið höfðað en vildi að öðru leyti ekki tjá sig um það. Tekist verður á um frávísunarkröfu í málinu í lok mánaðar.

- sh