Obama mun sigurstranglegri

Komið er að úrslitastund í forsetakosningunum í Bandaríkjunum. Barack Obama þykir líklegri til að hrósa sigri, en Mitt Romney heldur enn í vonina. Stjórnmálafræðingur spáir hörðum deilum á komandi árum.

Barack Obama Bandaríkjaforseti getur verið hæfilega bjartsýnn fyrir forsetakosningarnar sem fara fram í nótt, enda benda flestar skoðanakannanir til þess að hann muni tryggja sér þá 270 kjörmenn sem hann þarf til að hreppa hnossið.

Raunar eru helstu sérfræðingar, Nate Silver hjá New York Times og vefurinn RealClearPolitics, á því að Obama muni fá rúmlega 300 af kjörmönnunum 538.

Í þeim tólf ríkjum þar sem munurinn milli frambjóðendanna er enn innan skekkjumarka leiðir Obama í tíu en Mitt Romney aðeins í tveimur; Flórída og Norður-Karólínu.

Nú stendur keppnin um hin fjögur prósent sem eru óákveðin í lykilríkjunum og frambjóðendurnir heimsóttu átta mikilvægustu ríkin í gær. Þeir eru því á miklum endaspretti eftir gríðarlega langa og harðskeytta kosningatörn sem verður sennilega helst minnst fyrir þær metfjárhæðir sem varið hefur verið til hennar. Alls er talið að um sex milljörðum dala hafi verið eytt í kosningar til þings og forseta sem lýkur í kvöld.

James Thurber, prófessor í stjórnmálafræði við American University og einn af virtari stjórnmálaskýrendum í Bandaríkjunum, hélt fyrirlestur á vegum Alþjóðamálastofnunar Háskóla Íslands í gær þar sem hann sagði að flest benti til þess að Obama myndi vinna.

Vissulega ættu kjósendur flestir enn eftir að að skila sér á kjörstað, en sú spenna sem látið væri með í fjölmiðlum væri ofmetin.

Thurber sagði að Obama hefði tekið afgerandi forystu strax eftir aðrar sjónvarpskappræðurnar við Romney. Hinn síðarnefndi hefði óvænt komist inn í slaginn eftir að Obama hefði staðið sig herfilega í fyrstu kappræðunum. Eftir að forsetinn rétti sinn hlut í öðrum kappræðunum hefur hann haft vind í seglin þó að ekki sé mikill munur á frambjóðendunum í könnunum á landsvísu.

Kosningarnar til öldunga- og fulltrúadeildar þingsins hafa ekki síður verið harkalegar, en ekki er útlit fyrir að valdahlutföll breytist mikið.

Kjörstöðum í fyrstu lykilríkjum verður lokað á bilinu eitt til tvö í nótt að íslenskum tíma og ættu línur að skýrast strax í framhaldinu.

thorgils@frettabladid.is