Ekki rúm til mótmæla

Víðtækar öryggisráðstafanir hafa verið gerðar í Peking nú þegar 18. flokksþing kínverska Kommúnistaflokksins nálgast. Sumar kunna að koma einkennilega fyrir sjónir. Ekki má skrúfa niður rúður í leigubifreiðum í Peking, ekki kaupa sér fjarstýrða flugvél nema með leyfi lögreglu og bannað er að sleppa dúfum úr búrum.

Þá er fullyrt að hnífar og blýantayddarar hafi verið fjarlægðir úr hillum verslana og gengur orðrómur um að lögreglan skoði borðtenniskúlur vandlega til að ganga úr skugga um að á þeim sé ekki að finna nein skilaboð um mótmælaaðgerðir. Þá fullyrða mannréttindasamtök að einstaklingar, sem þekktir eru fyrir að hafa staðið að mótmælum eða undirskriftasöfnunum hafi verið handteknir.

Ekkert einsdæmi er að stjórnvöld víða um heim herði öryggisráðstafanir þegar stærri viðburðir nálgast. Þetta gerði til dæmis borgarstjórnin í London þegar Ólympíuleikar voru haldnir þar. Ekki er þó vitað til þess að leigubílstjórum hafi fyrr verið gert að fjarlægja úr bílum handföngin, sem notuð eru til að skrúfa niður rúður.