Togast á um Wimbledon-nafnið

Forráðamenn enska D-deildarliðsins AFC Wimbledon vilja að MK Dons breyti um nafn og hætti að nota Dons-nafnið. Þessi lið mætast í fyrsta sinn í sögunni í ensku bikarkeppninni í næsta mánuði.

Bæði félög voru stofnuð í kringum flutning Wimbledon FC til Milton Keys árið 2003. Stuðningsmenn Wimbledon voru afar óánægðir með þá tilhögun og stofnuðu AFC Wimbledon árið 2002. Um leið hættu þeir að mæta á leiki gamla félagsins sem kláraði tímabilið á Selhurst Park í Lundúnum áður en það flutti til Milton Keys í september 2003.

Sumarið 2004 var félagið formlega endurnefnt MK Dons og hafa stuðningsmenn gamla félagsins alla tíð verið afar ósáttir við þessa tengingu við sinn gamla klúbb.

Þess má þó geta að Wimbledon FC fór aldrei á hausinn og fyrstu árin litu forráðamenn MK Dons á sögu Wimbledon FC sem sína eigin. En því var hætt árið 2007 og nú er litið svo á að MK Dons hafi verið stofnað árið 2004.

Sá maður sem er hvað óvinsælastur meðal stuðningsmanna AFC Wimbledon er Pete Winkelman. Hann sat í stjórn Wimbledon FC sem ákvað árið 2001 að flytja félagið og fór svo fyrir hópi fjárfesta sem keypti félagið þremur árum síðan. Þá var það í greiðslustöðvun.

„Ég mun aðeins taka í hönd Winkelman ef ég fæ viðurkennt að hegðun þeirra hafi verið röng og að félagið ætli að hætta að nota Dons-nafnið," sagði Erik Samuelson, framkvæmdastjóri AFC Wimbledon.

„MK Dons hefur ekkert að gera með Wimbledon en þessi ákvörðun yrði að koma frá þeim – ekki mér," bætti hann við.

AFC Wimbledon byrjaði í níundu efstu deild á Englandi en fór upp um fimm deildir á níu árum og er nú í D-deildinni. Félagið er enn í eigu stuðningsmanna Wimbledon FC sem hafa ekki gleymt sögunni.

„Þetta er mikið tilfinningamál og minnir alla á hvernig félagið varð til. Við ætlum að gera okkar – spila leikinn og ná vonandi í sigur. Við fáum nú tækifæri til að sýna knattspyrnuheiminum hversu langt við höfum náð," sagði Samuelson.