Þúsundir mótmæla víða í Evrópu

Þúsundir launþega, víða að úr Evrópu, taka þátt í verkföllum og opinberum mótmælum í dag til þess að mótmæla auknu atvinnuleysi og niðurskurði á fjárlögum víða í ríkjum.

Röskun varð á samgöngum og starfi skóla á Spáni og í Portúgal í morgun vegna verkfalla sem hófust á miðnætti. Átök urðu milli lögreglu og mótmælenda í Madríd, en atvinnuleysi er gríðarlega hátt á Spáni og nær sums staðar 25 prósentum. Hundruðum flugferða hefur verið aflýst á Spáni og í Portúgal. Jafnframt er búist við verkföllum í Grikklandi, á Ítalíu og í Belgíu, þó þau verði líklegast ekki eins fjölmenn og á Spáni og í Grikklandi, og mótmælafundir verða haldnir í fleiri löndum.

Það eru samtök verkalýðsfélaga í Evrópu sem skipuleggja verkföllin. Judith Kirton-Darling, einn af leiðtogum samtakanna, sagði í samtali við BBC að niðurskurður á fjárlögum ríkja í Evrópu hefði slæm áhrif. Hann væri að auka á ójöfnuð og myndi ekki leysa þann vanda sem hagkerfið stæði frammi fyrir.

Alls eru 40 verkalýðsfélög frá 23 ríkjum sem taka þátt í mótmælum í dag.