Gagnrýni á 92 milljóna starfslokasamning

Helen Boaden, fréttastjóri breska ríkisútvarpsins BBC, og Stephen Mitchell, aðstoðarmaður hennar, hafa vikið tímabundið úr starfi vegna mistaka í fréttaflutningi.

Áður hafði útvarpsstjórinn George Entwistle sagt af sér vegna málsins, aðeins tæpum tveimur mánuðum eftir að hann tók við starfinu.

Hann á rétt á 450 þúsund pundum, jafnvirði rúmlega 92 milljóna króna, samkvæmt starfslokasamningi, en hefur verið hvattur til þess að þiggja ekki þetta fé.

Steve Field, talsmaður Davids Cameron forsætisráðherra, tók undir harða gagnrýni á þennan starfslokasamning: „Greinilega er erfitt að réttlæta veglegar greiðslur af þessari stærðargráðu,“ segir Field.

Allt þetta uppnám tengist fréttaflutningi BBC af sjónvarpsmanninum Jimmy Savile, sem lést í fyrra en hefur síðan verið sakaður um að hafa framið fjölda kynferðisbrota gegn unglingsstúlkum.

Í fréttaþættinum Newsnight var fyrr í mánuðinum fullyrt að ónafngreindur stjórnmálamaður væri flæktur í kynferðisbrotamál Saviles. Fljótlega fréttist við hvaða stjórnmálamann var átt, en jafnframt kom í ljós að enginn fótur var fyrir því að hann tengdist í reynd málinu.- gb